जागतिक पुस्तक दिन

वृक्षांपासूनी बनतो कागद

कागदापासूनी पुस्तक,

त्यातून मिळते ज्ञान असे की

तल्लख होते मस्तक

जागतिक पुस्तकदिनाच्या

सर्व आबालवृद्ध नागरिकांना

हार्दिक शुभेच्छा...!!!

झाडे लावा

झाडे जगवा...!!!

✒ K. Satish

अडचणींच्या डोंगरावरती वसले शिखर यशाचे

     आयुष्यात पुढे पुढे जाताना एक गोष्ट प्रकर्षाने जाणवली की, पुढे जाऊन जर काही चांगले घडणार असेल तर अगोदर अनेक वाईट घटना आपल्या आयुष्यात घडत जातात.
     पूर्वी हे घडत असताना खूप त्रास व्हायचा. वाटायचे आपण तर काही चुकीची कृती करीत नाही, तरी आपल्यावर असे आघात का होत असावेत ?....त्यामुळे मन सतत नकारात्मक चक्रात गुरफटले जायचे.
     परंतु, जीवनातील सर्व चढउतारांनी, घडत गेलेल्या घटनाक्रमांनी आयुष्याच्या या टप्प्यावर आल्यावर वाईट घटनांकडे पुढील आयुष्यात चालून येणाऱ्या सुखाची नांदी म्हणून पाहायला शिकवले. त्यामुळे वाईट घटना घडल्यास त्याचे दुःख हे लगेच विरून जाते व त्याकडे पाहण्याचा दृष्टिकोन हा नकारात्मक न राहून सकारात्मक होतो.
     ही मानसिकता लगेच तयार होणे अशक्य आहे. पण असंख्य आघात झेलल्यानंतर जेव्हा त्यातून चांगल्या घटना घडण्याची अनुभूती यायला लागते, तेव्हा आपसूक आपली विचारसरणी सकारात्मक बनू लागते.
     परंतु, अनेकांमध्ये ही प्रगल्भता येण्याआधीच त्यांच्याकडून आत्महत्येचे पाऊल उचलले जाते, अथवा सतत परिस्थितीला दोष देत रडत राहण्याची मानसिकता अधिक मोठ्या प्रमाणात विकसित होते.
     आणि याच मानसिकतेमुळे त्यांना या वाईट घटनाचक्राच्या दाट धुक्यांच्या थोडे पुढे सुखद यशाची सोनेरी किरणे पंख पसरून त्यांच्यासाठी उभी असल्याची आणि त्रासाची ही मालिका संपून सुखाचे क्षण उपभोगण्याच्या अगदी उंबरठ्यावर येऊन ते पोहोचले असल्याची जाणीवच होत नाही.
     त्यामुळे ज्यांना आपल्या आयुष्यात अजूनही अशा घटनाक्रमांना सामोरे जावे लागले नसेल त्यांनी ( मुख्यत्वेकरून तरूण पिढीने ) येणाऱ्या प्रत्येक वाईट प्रसंगाला, त्रासाला कंटाळून न जाता पुढे आपल्या आयुष्यात काहीतरी नक्कीच चांगले घडणार आहे, एखादा चांगला बदल घडून एखादी सुवर्णसंधी आपली वाट पाहत असावी म्हणूनच तिथपर्यंत पोहोचण्यासाठी ही आपली कठोर परीक्षा तर नाही ना ? हा विचार केल्यास घडणाऱ्या कोणत्याही वाईट घटनांचा नकारात्मक प्रभाव तुमच्यावर जास्त काळ राहणार नाही. आणि नकारात्मकतेपासून स्वतःला दूर ठेवणारी व्यक्ती सहसा अपयश पदरात पाडून घेत नाही. आणि काही कारणास्तव अपयश आलेच तरीही त्यातून यशाच्या नवीन मार्गाचा मागोवा घेण्याचा प्रयत्न करते. व अशा व्यक्तीसाठी यशाचे मार्ग हे आपसूकच खुले होतात.

✒ K. Satish

क्षणभंगुर आनंद

काही व्यक्तींना सतत दुसर्‍यांच्या खांद्यावर बंदूक ठेवून कपट कारस्थान करण्याची सवय असते. त्याअन्वये इतरांना दुःखी करण्याचा त्यांचा मानस असतो.

परंतु , अशा व्यक्तींना आयुष्यात कधीच आनंदाची खरी परीभाषा उमजू शकत नाही. कारण ते स्वतःच्या सुखापेक्षा इतरांच्या दुःखातच जास्त आनंदी होत असतात.

आणि अशा आनंदाचे आयुष्य अगदीच क्षणभंगुर असते.

✒ K. SATISH

निस्वार्थ जनसेवेचे मूर्तिमंत उदाहरण...'अनाथांची माय'

अनाथांची माय
थोर समाजसेविका, पद्मश्री
वंदनीय सिंधुताई सपकाळ यांना
सर्व देशवासियांतर्फे भावपूर्ण श्रद्धांजली

'स्वतःसाठी सगळेच जगतात पण जीवनातील खरा आनंद आणि त्याचा खरा मतितार्थ लपला आहे इतरांसाठी झिजण्यात'
जीवनाच्या या सत्वचनाचे मूर्तिमंत उदाहरण असलेल्या, सर्वांना वंदनीय व 'अनाथांची माय' अशी सर्व जनमानसांत ओळख असलेल्या.....खऱ्या अर्थाने सर्व विश्वाच्या माय असलेल्या थोर समाजसेविका, पद्मश्री सिंधुताई सपकाळ यांना सर्व देशवासियांतर्फे भावपूर्ण श्रद्धांजली !!!

काळाचे सोसले घाव
तरी हिम्मत ना हारली जिने,
झळा सोसूनी दुःखाच्या
इतरांना तारले तिने

जीवन वाहिले इतरांसाठी
लाखो वासरांची झाली गाय, 
अनंतात ती विलीन जाहली
अनाथांची हो माय

✒ K. Satish

यश

स्वप्नांना प्रयत्नांची जोड

अन् प्रयत्नांना परिश्रमांची,

कठोर परिश्रमानंतरच येते

चव ही सफल यशाची

✒ K. Satish

महाराष्ट्राची लोककला दुबईच्या धरतीवर

   सर्व रसिकजनांस कळवण्यास अत्यंत आनंद होत आहे की, 'बाजीराव मस्तानी' चित्रपटात आपल्या शब्दांची व आवाजाची जादू ओतणारे, 'मस्का' चित्रपटातील 'बया' या गाण्याचे पार्श्वगायक,  'डॅडी', 'बाॅईज २'  या चित्रपटांचे गायक, दोस्तीगीरी चित्रपटाचे गीतकार, 'चौर्य' चित्रपटाचे कोरियोग्राफर तसेच लोककलेचे गाढे अभ्यासक व मुंबई विद्यापीठाच्या लोककला अकादमीचे विभागप्रमुख प्रा. डाॅ. गणेश चंदनशिवे सरांच्या मार्गदर्शनाखाली महाराष्ट्राची लोककला १८ ते २३ नोव्हेंबर दरम्यान दुबईमध्ये आयोजित केलेल्या 'दि वर्ल्ड एक्स्पो २०२०' या महोत्सवात झळकणार आहे.

   त्यातही अतिशय आनंदाची गोष्ट म्हणजे यात आमचे बंधू व आमच्या लोकगीतांना श्रवणीय करण्यासाठी ज्यांनी आपले मोलाचे योगदान दिले आहे असे 'बालगंधर्व परिवार पुरस्कार' विजेते, महाराष्ट्रातील उत्कृष्ट ढोलकीवादक श्री. नितीन प्रधान हे आपल्या वादनकलेचे योगदान देणार आहेत.

   या महोत्सवात आपली कला सादर करून आपल्या महाराष्ट्राच्या लोककलेचे दर्शन सातासमुद्रापार असलेल्या रसिकजनांना घडवून देण्यासाठी सज्ज झालेल्या या सर्व गुणी कलावंतांस मनःपूर्वक शुभेच्छा...!!! 💐

✒ K. Satish

७ नोव्हेंबर विद्यार्थी दिवस

   ७ नोव्हेंबर १९०० रोजी डाॅ. बाबासाहेब आंबेडकर यांनी सातारा शहरातील राजवाडा चौकात असलेल्या गव्हर्नमेंट हायस्कूलमध्ये ( सध्याचे प्रतापसिंह हायस्कूल ) पहिल्यांदाच इंग्रजी पहिल्या इयत्तेत प्रवेश घेतला होता. याच दिवसापासून त्यांच्या शैक्षणिक जीवनाची सुरुवात झाली. या ठिकाणी ते १९०४ पर्यंत म्हणजेच इयत्ता ४थी पर्यंत शिकले.

  

   ज्ञानाचे मूर्तिमंत उदाहरण व सर्व विद्यार्थ्यांचे प्रेरणास्थान असलेल्या विश्वरत्न डाॅ. बाबासाहेब आंबेडकर यांच्या याच घटनेच्या स्मरणार्थ व विद्यार्थ्यांना त्यांच्या प्रगतीशील वाटचालीकरिता शिक्षणाचे महत्त्व पटवून देऊन त्यासाठी कराव्या लागणाऱ्या कठीण परिश्रमाची जाणीव करून देण्याहेतूने संपूर्ण महाराष्ट्रात ७ नोव्हेंबर हा दिवस विद्यार्थी दिवस म्हणून साजरा केला जातो.

✒ K. Satish