प्रेक्षागृह

पूर्वी माणसांची मनेही मोठी होती

आणि तशीच मोठी प्रेक्षागृहेही होती.

हळूहळू संकुचित झालेल्या मनांप्रमाणेच

प्रेक्षागृहेदेखील छोटी होत गेली.

✒ K. Satish

विश्वासघाताचा खंजीर

आपल्या विरोधी शत्रूपासून सावध असूनही

आपल्याला दगाफटका होतोच....

कारण आपला घात करणारा

विश्वासघाताचा खंजीर

आपल्या विरोधकाकडे नसून

आपल्याच एखाद्या निकटवर्तीयाकडे असतो.

✒ K. Satish

सत्याचा सामना

परिस्थिती ही आहे गंभीर

खंबीरपणाने लढायचे,

कधीतरी मृत्यू येणारच हो

मग का झुरून मरायचे ?

✒ K. Satish

थांबवा रे...

      कोरोना खोटा आहे असे मी मुळीच म्हणणार नाही. कारण त्याचा त्रास मी स्वतः अनुभवला आहे. परंतु , त्याच्या नावाखाली अनेकजण आपली पोळी भाजण्याचा जो काही घाणेरडा प्रकार करीत आहेत त्याचा निषेध करावा तितका कमी.

     पण मरणाऱ्यांच्या टाळूवरील लोणी खाणार्‍यांकडून चांगल्याची अपेक्षा कशी करता येईल ?

     मूठभर राजकारण्यांच्या हाती देश चालवायला दिलेल्या सामान्य नागरिकांना मात्र या राजकारण्यांच्या राजकीय कुरघोड्यांचे शिकार होऊन या देशाचे खरे वारसदार असतानाही गुलामगिरीचे आयुष्य जगावे लागते.

     याहून मोठी धक्कादायक व दुर्दैवी गोष्ट दुसरी कोणती असेल ? ? ?

✒ K. Satish

योग्य संगत महत्वाची

     सोन्या पासून निरनिराळे दागिने तयार होतात. परंतु प्रत्येक दागिना हा नजरेत भरतोच असे नाही. कारण त्याची सुंदरता ही तो दागिना घडविणाऱ्या कारागिराच्या कौशल्यावर व कामाप्रती असलेल्या निष्ठेवर अवलंबून असते.

     सुंदर घडलेल्या दागिन्याचे सर्वच जण कौतुक करतात व प्रत्येकाला तो हवाहवासा वाटतो. आणि तो दागिना ज्याच्याजवळ असेल त्याचीही प्रशंसा होते.

     आपल्या जीवनातही असेच आहे. आपण कितीही बुद्धिमान असलो तरी त्या बुद्धीचा वापर योग्यरितीने व योग्य ठिकाणी कशाप्रकारे करावयाचा याचे ज्ञान येण्यासाठी चांगल्या गुरूंचे मार्गदर्शन लाभणे तसेच चांगल्या लोकांच्या सहवासात राहणे गरजेचे असते.

     चुकीचे मार्गदर्शन अथवा चुकीच्या लोकांची संगत लाभल्यास बुद्धिमान व्यक्तीचेही चातुर्य कुमार्गासाठी वापरले जाऊन त्याची वाटचाल अधोगतीकडे जाते.

     त्यामुळे नेहमी चांगल्या व्यक्तींच्या मार्गदर्शनाखाली व चांगल्या व्यक्तींच्या सहवासात राहिल्यास आपली प्रगती होऊन जनमानसांत आपली प्रशंसा झाल्याशिवाय राहणार नाही.

✒ K. Satish

अन्न

पक्वान्नांची रास कुणापुढे

कुणास एकही घास मिळेना,

विरोधाभास हा या जगतातील

संपणार कधी मज हे कळेना

✒ K. Satish

कपटवृत्तीची वीण सुटावी

     कोरोनाच्या संकटाने भल्याभल्यांच्या अहंकारी आणि कपटी वृत्तीला धूळ चारली आहे. परंतु अजूनही असे बरेच महाभाग शिल्लक आहेत की जे आपल्या या दोषाला घट्ट पकडूनच पुढील आयुष्य जगण्याच्या मानसिकतेत आहेत.

     अशा भ्रमित लोकांना भविष्यातील त्यांच्या आयुष्यात कोरोनापेक्षाही जास्त धोका त्यांच्या या अपप्रवृत्तीपासून असेल.

     कारण दुसर्‍याचे सुख पाहिल्यावर यांच्या मनाला अतोनात यातना होतात आणि त्यामुळे दुसर्‍याच्या आयुष्यात दुःखाचा शिडकाव करण्यासाठी कटकारस्थान करण्याच्या नादात हे लोक आपल्या आयुष्यातील बहुमुल्य वेळ आणि आनंदी क्षणांचा उपभोग घेण्यास पुरते विसरून जातात. मात्र त्यांच्या अथक प्रयत्नांनंतरही समोरील व्यक्तीच्या वाट्याला दुःख न आल्यास अशा व्यक्ती सैरभैर होऊन आपले पुढील आयुष्य नकळतपणे दुःखाच्या खाईत लोटण्यास स्वतःच जबाबदार ठरतात.

' काळाच्या आघाताने तरी

कपटवृत्तीला त्यागावे,

ज्याला नाही जमले त्याने

परिणाम त्याचे मग भोगावे '

✒ K. Satish