गरज राजकीय प्लास्टिक सर्जरीची

     आपल्या देशात आजतागायत चालत आलेल्या राजकारणाविषयी माझं मत काही चांगलं नाहीच. त्यामुळे मी राजकारणाचा सतत तिरस्कारच करत आलोय.

     परंतु काळाच्या ओघात हे कळून चुकलंय की, राजकारणाचा तिरस्कार करून दुर्लक्षित करणारी ही बाब नाहीये. कारण राजकारणाशिवाय देश चालूच शकत नाही. देशातील समस्यांचे, जनतेच्या अडीअडचणींचे निराकरण करणे शक्य होणार नाही. आणि म्हणूनच माझे असे मत झाले आहे की, इथून पुढे जर का देशातील जनतेला सुखी ठेवून, सर्व देशात शांतता, बंधुभाव आणि समतेचे राज्य प्रस्थापित करून आपल्या देशाला प्रगतीपथावर न्यायचे असेल तर राजकीय क्षेत्रात चांगल्या विचारांनी प्रेरित झालेल्या... तोडा, फोडा आणि राज्य करा या  जुन्या राजकीय पद्धतीला फाटा देणार्‍या सुविचारी तरूण तरुणींनी सहभाग घ्यायला हवा.आणि अशा असंख्य तरूण- तरुणींची एक मोठी फळी तयार होणे गरजेचे आहे.

     फक्त दुर्दैवाने हे नमूद करावेसे वाटते की, चांगल्या विचारांच्या व्यक्तींना राजकारणात यश मिळावावयाचे असेल तर सध्याच्या प्रस्थापितांना तोंड देण्यासाठी त्यांच्याकडे सुदृढ बलवान शरीर आणि पैसा यांची साथ असणे आवश्यक झाले आहे. कारण सत्ता, पैसा आणि ताकद यांच्या प्रभावाखाली दबून देशातील जनता स्वाभिमानाने जगणेच विसरून गेली आहे. व त्याचबरोबर राजकीय भक्तीला उधाण येऊन जनतेला या गोष्टीचा विसर पडलाय की, आपला भारत देश म्हणजे लोकांनी, लोकांसाठी, लोकांमार्फत चालवलेले राष्ट्र आहे. आणि राजकीय पुढारी हे निवडणुकीच्या माध्यमातून निवडून येऊन देशाचा कारभार चालवणारे आणि त्याअनुषंगाने जनतेच्या सामाजिक आणि मूलभूत समस्या सोडवून त्यांना चांगले जीवनमान मिळवून देण्यासाठी प्रयत्न करणारे एक जनसेवक आहेत.

     आणि म्हणूनच या सर्व जनतेमध्ये पुन्हा नवचैतन्य निर्माण करावयाचे असेल तर आत्ताच वर सांगितल्याप्रमाणे बदल घडायला सुरूवात होणे आवश्यक आहे.

     आणि हे अवघड आहे परंतु अशक्य मुळीच नाही.

     वेळ आणि परिस्थितीनुसार अशक्यदेखील शक्य होते.

     आत्ता जर सुरूवात झाली तर कदाचित आत्ताच्या पिढीला त्याचे पाहिजे तसे परिणाम पहावयास मिळणार नाहीत. परंतु, पुढील पिढीस मात्र नक्कीच खर्‍या अर्थाने आपण जनतेच्या राज्यात, खर्‍या लोकशाहीसंपन्न देशात राहत असल्याची अनुभूती येईल.....!!!

धन्यवाद...!!!

✒ K. Satish

प्रवास

आयुष्याचा प्रवास हा

अडथळे रस्त्यामध्ये अगणित,

पार करूनी त्यांना अलगद

पुढे निघालो मीही ऐटीत

✒ K. Satish

वंदन थोर समाजसुधारकांना

थोर समाजसुधारक - संत गाडगेबाबा

पैशाची चणचण असेल तर जेवणाची भांडी विका.

दागदागिने खरेदी करू नका. तुटक्या फुटक्या घरात रहा. पण मुलांना शिक्षण अवश्य द्या.

शिक्षणाविषयी अतिशय मार्मिक टिप्पणी करणारे,

शिक्षणाला अतिशय महत्त्व देणारे, शिक्षणाचे महत्त्व लोकांना पटवून सांगणारे,

मानवतावादी विचारांचा प्रसार करून अंधश्रद्धेवर घणाघाती हल्ला चढवणारे,

स्वच्छतेचे महत्त्व लोकांना आपल्या कृतीद्वारे पटवून सांगणारे अखंड भारतातील महान संत - थोर समाजसुधारक

' संत गाडगेबाबा '

यांना त्यांच्या जयंतीनिमित्त विनम्र अभिवादन...!!!

✒ K. Satish

लाडक्या लेकीस वाढदिवसाच्या शुभेच्छा

लाडक्या लेकीस, सिद्धीस

जन्मदिवसाच्या खूप खूप

शुभेच्छा...

आनंदाचा क्षण हा आला

जन्मदिन हा तुझा गं आला,

धकाधकीच्या जीवनात या

आनंदाचा वर्षाव झाला 

प्रगतीपथावर जावे तू गं

स्वतःस घडवत न्यावे तू गं,

येथील अडथळे अगणित तरीही

अद्वितीय कार्य करावे तू गं 

क्षमता आहे तुझ्यात मोठी

जिद्द, चिकाटीदेखील मोठी,

आकार देऊन जीवनास तू

कार्य करावे देशासाठी

✒ K. Satish

प्रजाप्रतिपालक रयतेचे राजे

आजच्या या मंगलदिनी माझ्या या रयतेच्या राजाचा जन्म झाला.

छत्रपती शिवरायांचे आचार-विचार सर्वच खरोखरीच प्रेरणादायी आहेत.

आजच्या या तरूण पिढीने त्यांच्या नावाचा नुसता जयघोष करण्याऐवजी त्यांचे आचार-विचार आपल्या नसानसांत भिनवावे...

हाच खर्‍या अर्थाने त्यांना मानाचा मुजरा ठरेल...!!!

दुश्मन आणि कावेबाज

सोडून कोणालाच भय वाटले नाही

माझ्या या राजाच्या राज्यात,

स्वतंत्र भारताची लोकशाही

तेव्हाही नांदत होती

माझ्या शिवरायांच्या स्वराज्यात...!!!

अखंड विश्वात खर्‍या अर्थाने

रयतेचा राजा ठरलेल्या

छत्रपती शिवाजी महाराजांना

तमाम रयतेकडून

त्रिवार मानाचा मुजरा...!!!

✒ K. Satish 

विचारांवर नियंत्रण हवे

द्विधा मनस्थितीतील माणसे सैरभैर होऊन जातात.

अशा सैरभैर झालेल्या माणसांची विचार करण्याची शक्तीच कमी होऊन बसते.

आणि मग अशी माणसे संघटित होणे अशक्यच......

' संगठन नाही तर संघर्ष नाही

संघर्ष नाही तर न्याय नाही

आणि अन्याय सहन करून जगण्याला

खरंच काही अर्थ नाही.......'

म्हणून विचारांवर नियंत्रण ठेवून बौद्धिक क्षमता वाढवायला हवी.....

✒ K. Satish

व्हॅलेन्टाइन

माझ्यासारख्या कवी/गीतकारासाठी व्हॅलेन्टाइन म्हणजे त्याची लेखणी व त्यातून अवतरणारे शब्द.

आणि या माझ्या व्हॅलेन्टाइनला सदैव ताजेतवाने व प्रफुल्लित ठेवणे हे माझे कर्तव्य आहे.

✒ K. Satish

चुंबन

मनातील आपलेपणाची भावना शब्दांविना व्यक्त करण्याचे उत्तम माध्यम म्हणजे चुंबन. 

प्रियकर आणि प्रेयसीच्या चुंबनापेक्षाही

बालपणी आई वडिलांनी घेतलेले आपले चुंबन आणि वृद्धापकाळात आपल्या मुलांनी घेतलेले आपले चुंबन हे अधिक सुखावणारे असते.

✒ K. Satish

आलिंगन

प्रेमाने दिलेल्या आलिंगनात

अशी जादू असते की, समोरील व्यक्ती

कितीही मोठे दुःख असो वा राग असो...

अगदी क्षणात विसरून जाऊ शकते.

✒ K. Satish

वचन

पाळता येईल असेच वचन द्यावे,

अन् दिलेले वचन नेहमी पाळले जावे

✒ K. Satish

तुझीच आस अन् तुझाच ध्यास

जीवापाड हे प्रेम तुझ्यावरी

तुझ्यात माझा जीव गुंततो,

आस तुझी अन् ध्यास तुझा मज

तुजविन जीव हा व्याकूळ होतो.

✒  K. Satish

नात्यातील गोडवा

गोड अशा नात्यांना

प्रेमाची गोडी,

अशीच अजोड राहो

तुझी नि माझी जोडी

✒ K. Satish

संघर्ष

कधी संपेल हा संघर्ष जीवनाचा

अन्यायाला मातीत गाडण्याचा,

झुंज देऊनी अन्यायाशी

मार्ग शोधतो मी न्यायाचा

✒ K. Satish

 

गुलाबपुष्पे

गुलाबपुष्पे रंगीबेरंगी

भाव निराळे दर्शविती,

मैत्री, प्रेम नि विश्वासाचे

शब्दांविन दर्शन घडविती

✒ K. Satish

 

कोटी कोटी वंदन

माता रमाई

कर्तव्यनिष्ठ, स्वाभिमानी आणि त्यागाचे मूर्तिमंत उदाहरण...

ज्यांनी असंख्य संकटांना तोंड देत असतानादेखील

दीन दुबळ्यांच्या हक्कांसाठी लढणार्‍या बाबासाहेबांना आपल्या दुःखाची थोडीही झळ पोहोचू दिली नाही.

आज बाबासाहेबांनी त्यांच्या संपूर्ण आयुष्यात असंख्य

दीन दुबळ्यांसाठीच नव्हे, आपल्या भारत देशासाठीच नव्हे तर संपूर्ण विश्वासाठी जे काही महान योगदान दिले आहे. ते फक्त या माऊलीमुळेच शक्य झाले.

अशा असंख्य दीन दुबळ्यांच्या आईला...

माता रमाईला कोटी कोटी वंदन...!!!

✒  K. Satish

अखंडित राहो क्रांतिकारकांचा वारसा

     अन्यायकारक घटनांचा अनुभव घेत असताना बहुतांशी लोकांना वाटत असते की, आपल्यावर अन्याय होत आहे आणि त्याविरुद्ध क्रांती घडायला हवी आणि अन्यायाचा बीमोड व्हायला हवा.

परंतु या क्रांतीच्या लढ्यातील क्रांतीकारक मात्र दुसऱ्याच्या घरात जन्मलेला हवा. आणि जर हा लढा यशस्वी झाला आणि हक्कांची लढाई जिंकली तर त्या हक्कांच्या जोरावर प्रगती करणार्‍या आर्थिक संपन्नता लाभलेल्या व्यक्ती, उच्चशिक्षण प्राप्त झालेल्या व्यक्ती, प्रतिष्ठित व्यक्ती, उद्योगपती, नावाजलेले कलाकार या सर्वांचा मात्र आपल्या घरी उदय व्हावा. 

     हा विचार बदलून सर्वजण संघटित राहिल्यास अन्याय करणारा देखील धाडस करणार नाही.

     महापुरुषांचे, क्रांतिकारकांचे नुसते गुणगान गाऊन त्यांना अभिवादन करण्यापेक्षा त्यांच्या कार्यातून प्रेरणा घ्या. व अन्यायाविरुद्ध लढण्याचा त्यांचा वारसा पुढे अखंड सुरू ठेवा. तेव्हाच त्यांचे बलिदान व्यर्थ गेले नाही असे म्हणता येईल.

     नाहीतर आयत्या पिठावर रेघोट्या मारणाऱ्यांची संख्यादेखील या जगात कमी नाही.

     छत्रपती शिवाजीमहाराज, शहीद भगतसिंग, नेताजी सुभाषचंद्र बोस, विश्वरत्न डॉ. बाबासाहेब आंबेडकर, राजर्षी छत्रपती शाहूमहाराज, क्रांतिसूर्य महात्मा ज्योतिबा फुले, अद्वितीय छत्रपती संभाजी महाराज अशा अनेक महापुरुषांचा नुसता मुखातून जयजयकार करण्यापेक्षा अन्यायाविरुद्ध लढण्याची त्यांची तळमळ अंगी भिनवल्यास खर्‍या अर्थाने आपणास मिळालेल्या मानव जन्माचे सार्थक होईल.

✒ K. Satish

फुलासम दरवळावे कर्तृत्व आपुले

      फुलाचा मनमोहक सुगंध चोहीकडे दरवळत असतो. त्याचे नैसर्गिक सौंदर्य कोणालाही मोहित करते. त्याच्या एखाद्याजवळ असण्यानेदेखील ते बाळगणाऱ्याच्या सौंदर्यात व उत्साहात मोठी भर पडते. आणि त्याच्या मनमोहक सुगंधाचा व त्याच्या नैसर्गिक सौंदर्याचा महिमा त्याला स्वतःहून इतरांना सांगावा लागत नाही. सर्व लोक त्याच्या नैसर्गिक सौंदर्यामुळे त्याच्याकडे आकर्षित होतात व त्याचा मनमोहक सुगंध आसमंतात असा मिसळून जातो की, लोक स्वतःहून त्याच्या सानिध्यात राहण्यास उत्सुक असतात.  लोक आपणहून त्याच्या चांगुलपणाची आणि चांगल्या गुणांची चर्चा करीत असतात. व त्याची ही जनमानसांत सुरू असलेली चर्चा त्याच्या नकळतही चोहीकडे चर्चिली जात असते.

     माणसाचे कर्तृत्वदेखील असेच असायला हवे. आपले वागणे, बोलणे, समाजासाठी झटण्याची तळमळ, निस्वार्थीपणा, कष्टाळूपणा, निर्भीड बाणा, प्रामाणिकपणा या गुणांच्या जोरावर आपण आपले व्यक्तिमत्त्व इतके सुंदर, बहारदार बनवायला हवे की, आपला सहवास, आपले मार्गदर्शन लोकांना हवेहवेसे वाटावे. आपल्या कार्याची स्तुती आपल्याला आपल्या तोंडून सांगायला लागू नये. आपल्या सत्कार्याची अनुभूती लोकांना येऊन त्यांनीच त्याची चर्चा करावी. अशा कीर्तीचे मोल खरोखर अगदी अनमोल आहे.

स्वतःची स्तुती स्वतः करू नये

इतरांच्या मुखातून ती व्हावी,

आपल्या सत्कार्याची महती

सर्वदूर पसरावी...!!!

✒ K. Satish